Нутаг ухаан: Хүн, байгаль, мал амьтны амин хэлхээ
Нүүдэлчин түмний байгаль дэлхийгээ танин мэдэж, зохицон амьдарч ирсэн нүүдлээр нутаглах ухаан буюу "Нутаг ухаан" бол манай төслийн гол тулгуур юм. Бид энэхүү өв соёлыг орчин үеийн шинжлэх ухааны арга зүйтэй хослуулан, тал хээрийн экосистемийг ирээдүй хойчдоо бүрэн бүтэн өвлүүлэхээр ажиллаж байна. Энэхүү зорилгын хүрээнд Сүхбаатар аймгийн тал хээрийн бүс нутагт "Нэг эрүүл мэнд" хандлагад суурилсан мал аж ахуйн тогтвортой хөгжлийн шинэ жишгийг тогтоохоор ажиллаж байна.
Нутгийн иргэд: хамтын хүч, тогтвортой хөгжил
Чадваржуулах нь: Сүхбаатар аймгийн Баяндэлгэр, Баруун-Урт, Сүхбаатар, Мөнххаан, Дарьганга сумдын малчдын амьжиргааг дэмжих, уур амьсгалын өөрчлөлтөд тэсвэртэй байдлыг нэмэгдүүлэх нь бидний нэн тэргүүний зорилт юм.
Эрүүл мэндийн цогц үйлчилгээ: "Нэг эрүүл мэнд" явуулын төвүүдээр дамжуулан малчин өрхүүдэд эрүүл мэндийн оношилгоо, сургалт, урьдчилан сэргийлэх зөвлөгөөг газар дээр нь хүргэж байна.
Мал сүрэг: сүргийн эрүүл мэнд ба чанар
Сүргийн эрүүл мэнд: Нүүдэлчдийн уламжлалт мал аж ахуйн ухааныг орчин үеийн эмнэлгийн тусламж үйлчилгээтэй холбож, малын халдварт өвчнөөс урьдчилан сэргийлэх, тэжээлийн хүртээмжийг сайжруулахад анхаардаг.
Өв уламжлалыг хадгалахын зэрэгцээ мал сүргийг эрүүлжүүлэх, тэжээлийн хүртээмжийг сайжруулах замаар зудыг хохирол багатай даван туулах боломжийг бүрдүүлнэ.
Эх нутаг: Экосистемийн тэнцвэр ба байгаль хамгаалал
Бэлчээрийн менежмент: Тал хээрийн биологийн олон янз байдлыг хамгаалж, цөлжилт, бэлчээрийн доройтлыг бууруулах замаар экосистемийн тэнцвэрт байдлыг сэргээнэ.
Мэдлэгийн залгамж холбоо: Орон нутгийн ургамлын үрийн нөөцийг бүрдүүлэх, зэрлэг ан амьтдын амьдрах орчныг хамгаалах чиглэлээр Odyssey Conservation Trust байгууллагатай хамтран шинжлэх ухааны үндэслэлтэй арга хэмжээнүүдийг хэрэгжүүлж байна.
