“Тогтвортой ноос ноолуурын эвсэл” ТББ, Мал эмнэлгийн ерөнхий газартай 2026 оны 3-р сарын 24-ний өдөр хамтран ажиллах санамж бичиг байгуулав.
Энэхүү “Хамтран ажиллах санамж бичиг”-ийн зорилго нь “Дасан зохицохуйн зам: Малчин, мал амьтан, тал хээрийн нэг эрүүл мэнд” төслийн хүрээнд Сүхбаатар аймгийн Мөнххаан, Баяндэлгэр, Дарьганга, Сүхбаатар, Баруун-Урт сумдын “малчид, мал амьтан, бэлчээр”-ийн харилцан шүтэлцээг сайжруулахад чиглэсэн үйл ажиллагааг хэрэгжүүлэх, малын эрүүл мэндийг хамгаалах, холбогдох хууль тогтоомжийн хүрээнд үр дүнтэй хамтран ажиллахад оршино.
Хамтын ажиллагааны хүрээнд Нэг эрүүл мэндийн 3 кредит хичээлийн хөтөлбөрийг ХААИС, МУИС, Их Британийн Эзэн Хааны нэрэмжит Мал эмнэлгийн коллеж, Бельгийн Льежийн их сургуулийн баг хамтран боловсруулж байгаа бөгөөд энэхүү хөтөлбөрөөр Монгол улсын мал эмнэлгийн мэргэжилтнүүд, хүнс, хөдөө аж ахуй, эрүүл мэнд, байгаль орчин, боловсролын мэргэжилтнүүдийг сургахад хамтран ажиллах юм.
Мөн түүнчлэн “Дасан зохицохуйн зам” төслийн “Баяндэлгэрийн улаан ямааны цөм сүргийг сайжруулах” дэд төслийн хүрээнд халдварт ба паразиттах өвчин, ялангуяа зооноз өвчний тандалт судалгаа хийхээр тохиров.
Жендэрийн мэдрэмжтэй, нэг эрүүл мэнд үзэл баримтлалд тулгуурлан тус төсөл Мал эмнэлгийн ерөнхий газартай хамтран Нэг эрүүл мэндийн төв байгуулах болон танхимаар дамжуулан малын эрүүл мэндийн талаарх мэдээлэл түгээх, Сүхбаатар аймгийн Мал эмнэлгийн газрын хүчин чадавхийг сайжруулах, Нэг эрүүл мэндийн салбар дамнасан түншлэл, хамтын ажиллагааг дэмжих орчинг бүрдүүлэхэд чиглэсэн ажлуудыг төлөвлөөд байна.
Энэхүү хамтын ажиллагаа нь 2025-2028 оны хооронд хэрэгжих ба орон нутгийн төдийгүй үндэсний хэмжээнд малын эрүүл мэндийг сайжруулах, Нэг эрүүл мэнд хандлагыг бэхжүүлэхэд бодитой нөлөө үзүүлнэ гэдэгт итгэлтэй байна.