Сүхбаатар аймгийн Засаг даргатай зурсан хамтран ажиллах санамж бичгийн хүрээнд Тогтвортой ноос ноолуурын эвсэл, Одиссей Консервейшн Траст ОУБ хамтран хэрэгжүүлж буй “Дасан зохицохуйн зам: малчин, мал амьтан, тал хээрийн нэг эрүүл мэнд” төсөл 2025-2028 оны хооронд Сүхбаатар аймгийн Баруун-Урт, Мөнххаан, Дарьганга, Баяндэлгэр, Сүхбаатар сумдад хэрэгжиж байна.
Төсөл жендэрийн мэдрэмжтэй, нэг эрүүл мэнд үзэл баримтлалд тулгуурлан үйл ажиллагаагаа явуулж байгаа бөгөөд төслийн үйл ажиллагаа, сургалтууд Нэг эрүүл мэндийн төв болон танхимуудаар олон нийтэд хүрэх юм. Сүхбаатар аймгийн Сүхбаатар, Дарьганга, Баяндэлгэр сумын танхимууд 2026 оны 5-р сарын 4-нөөс 7-ны хооронд нээлтээ хийж, малчид иргэдэд үүдээ нээлээ.
Нэг эрүүл мэндийн танхимын нээлтийн үеэр, Сүхбаатар сум, 2026.05.04
Нэг эрүүл мэндийн танхимын нээлтийн үеэр, Дарьганга сум, 2026.05.05
Нэг эрүүл мэндийн танхим сум бүрд харилцан адилгүй байршилтай ч дотоод тохижилт, сургалтын хэрэглэгдэхүүн бүгд нэг стандартын дагуу хийгдэж байна. Тухайлбал: танхим бүрд ухаалаг дэлгэц байрлуулан, цахим сургалтын тоног төхөөрөмж бүхий өрөөнүүдийг байгуулсан нь нь нутгийн иргэд орон нутгаасаа дэлхийн өнцөг булан бүрээс мэргэжилтэн, багш нарын хичээлийг онлайнаар судлах боломжийг бүрдүүлж байгаа юм.
Төслийн захирал Б.Батхишиг, Сүхбаатар сумын Засаг дарга Ц.Ариунцогийн хамт, Сүхбаатар сум, 2026.05.04
Нэг эрүүл мэндийн танхим ийнхүү үүд хаалгаа нээснээр малчид, иргэд, нэг эрүүл мэндийн идэвхжүүлэгчид, салбар бүрийн мэргэжилтнүүдэд мэдлэг мэдээлэл түгээж, тэдний идэвх, чадавхийг нэмэгдүүлэхийн зэрэгцээ сумын хүн, мал амьтан, байгаль орчны эрүүл мэндийг цогцоор нь дэмжсэн тогтвортой хөгжлийн суурь нөхцөл улам бэхжих ач холбогдолтой юм.