Дасан зохицохуйн зам төсөл жендэрийн мэдрэмжтэй, нэг эрүүл мэнд хандлагыг нэвтрүүлснээр уур амьсгалын өөрчлөлтийн эрчимжлилт, биологийн олон янз байдлын алдагдаа, бэлчээрийн доройтол, хүн, мал амьтан, экосистемд үүсч буй эрсдэл зэрэг харилцан хамааралт сорилтуудыг шийдвэрлэх зорилготой.
Төслийн хүрээнд Их Британийн Хатан xааны нэрэмжит Мал эмнэлгийн коллеж, Бельги улсын Льежийн Их Сургууль, Одиссей Консервейшн Траст, Тогтвортой ноос ноолуурын эвсэл ТББ-уудын эрдэмтэн судлаачид, мэргэжилтнүүд хамтран “Нэг эрүүл мэндийн сургагч багш бэлтгэх олон улсын сургалтын хичээлийн гарын авлага” боловсруулж, гарын авлагын дагуу сургагч багш нарыг бэлтгэсэн юм.
Сургалт цахим болон биечилсэн хөтөлбөрөөр 9 сар үргэлжилж, 2026 оны 5-р сарын 1-ний өдөр амжилттай төгсөгчдөд сертификат гардуулан өглөө. Төсгөлтийн үйл ажиллагаанд төслийн хамтран хэрэгжүүлэгч Одиссей Консервейшн Траст ОУБ-ын ерөнхийлөгч Др. Жулие Гарнер, “Лоро Пиана Монгол” ХХК-ийн гүйцэтгэх захирал Б.Хулан, “Тогтвортой ноос, ноолуурын эвсэл” ТББ-ын Монгол дахь салбарын захирал С.Вандандорж, “Дасан зохицохуйн зам” төслийн захирал Др. Б.Батхишиг нар оролцож, төгсөгчдөд баяр хүргэсний сацуу “Нэг эрүүл мэнд хэрэгжүүлэгчдийн платформ”-ыг үүсгэн байгуулах шийдвэр гаргав.
Төслийн захирал Б.Батхишиг, төслийн зөвлөх Жулие Гарнер нар сертификат гардуулж байна, Улаанбаатар хот, 2026.05.01
Төслийн захирал Б.Батхишиг, төслийн зөвлөх Жулие Гарнер нар төгсөгчдийн хамт, Улаанбаатар хот, 2026.05.01
Төслийн менежер Б.Даваажаргал “Манай төсөл хэрэгжээд дууссан ч Нэг эрүүл мэндийн хүрээлэл бол насан туршийнх билээ. Аливааг хийхдээ, шийдвэр гаргахдаа дандаа хүний, мал амьтны, хүрээлэн буй орчны эрүүл мэндийг хамтад нь авч үзэж, салбар дамнаж, хөрвөсөн хамтын ажиллагааг хэрэгжүүлдэг мэрэгжилтнүүдийн Нэг эрүүл мэндийн сүлжээ бий болж байгаа нь энэхүү сургалтын хамгийн том үр дүн юм.” хэмээн сургалтын ач холбогдлыг онцлов.
Төслийн менежер Б.Даваажаргал, Улаанбаатар хот, 2026.05.01
Төгсөгч, малын эмч Б.Энхтуяа “Нэг эрүүл мэнд хэдий цоо шинэ ойлголт биш ч яг газар дээр нь хэрэгжүүлэхэд ойлголт думтаг, хийсвэр байсан. Харин энэхүү сургалтад сууснаар Нэг эрүүл мэндийн талаарх миний ойлголт илүү хөрсөн дээр бууж, яаж хэрэгжүүлэх, өдөр тутмын ажил дээрээ хэрхэн уялдуулах аргыг олсон.” гэж сургалтын үр дүнгийн талаар ярьсан юм.
Төсгөгч, малын эмч Б.Энхтуяа, Улаанбаатар хот, 2026.05.01
Нэг эрүүл мэндийн сургагч багш бэлтгэх сургалтын төгсөгч нар цаашид өөр өөрсдийн талбарт сурсан мэдсэнээ хэрэгжүүлэн ажиллахаас гадна эргэн тойрондоо мэдлэг, мэдээллийг түгээн, Нэг эрүүл мэндийн сүлжээг улам бэхжүүлэн ажиллах юм.